БАРРАСИИ МАСЪАЛАҲОИ ПЕШГИРИИ ТАКРОРШАВИИ БЕМОРИҲО

        Душанбе, 5 декабр (АМИТ «Ховар», Фарангис Раҳимова).- Бо кӯмаки барномаи «Саломатии ҷомеа» — и  намояндагии  Пажӯҳишгоҳи  ҷомеаи кушод — бунёди мадад» дар Тоҷикистон ва ташаббуси маркази табобати бемориҳои ВИЧ ва СПИД 6 декабр дар пойтахти ҷумҳурӣ дар мавзӯи «Роҳу усулҳои  пешгирии такроршавии бемориҳо» машварати духтурон баргузор мегардад. Мухбири АМИТ «Ховар» хабар медиҳад, ки  машварати мазкур мувофиқи Меморандуми  ҳусни тафоҳуми имзонамудаи Вазорати тандурустии Ҷумҳурии Тоҷикистон ва  шӯъбаи созмони байналмилалии Пажӯҳишгоҳи «Ҷомеаи кушод — Бунёди мадад» дар Тоҷикистон гузаронида мешавад. Ҳадафи машварат ҷамъбасти натиҷаҳои дастовардҳои соҳа ва муайян намудани нақшаҳои оянда мебошад. Дар машварат намояндагони вазоратҳои тандурустӣ ва адлия, шӯъбаҳои  минтақавии мубориза ба муқобили СПИД, созмонҳои ҷамъиятӣ ва байналхалқӣ ширкат меварзанд. Барномаи пешгирии  такроршавии бемориҳо барои одамоне, ки ҳамроҳи беморони гирифтори ВИЧ ва СПИД зиндагӣ мекунанд, дар ҷумҳурӣ соли 2006 шурӯъ шуда буд ва  имрӯз нисбати  205 нафар татбиқ карда мешавад.