ДАР ТОҶИКИСТОН РӮЗИ БАЙНАЛХАЛҚИИ МАЪЮБОНРО ҶАШН МЕГИРАНД

Душанбе, 1 декабр. (АМИТ «Ховар», Мавҷуда Давлатзода).- Бахшида ба Рӯзи байналхалқии маъюбон — 3-юми декабр «Иттиҳодияи Миллии Маъюбони Тоҷикистон» якчанд чорабинӣ ташкил намудааст. Аз «Иттиҳодияи Миллии Маъюбони Тоҷикистон» ба мухбири АМИТ «Ховар» хабар доданд, ки бахшида ба ин рӯз 2-юми декабр дар бинои Маркази фарҳангии ҷавонон — «Ориёно» чорабинии Ҷамъияти нобиноён ва Созмони занҳои маъюб баргузор мегардад. Инчунин 3 -юм ва 5-уми декабр дар мавзӯъҳои «Ҳуқуқҳои баробар ва имкониятҳои баробари занҳои имконияташон маҳдуд бо воситаи CEDAW» ва «CEDAW ва нақши он дар пешравии ҳуқуқҳои занҳои маъюб», ки аз ҷониби Созмони занҳои маъюб пешбинӣ шудааст, мизи мудаввар ва семинар баргузор мегардад.