«ИМОН ИНТЕРНЕЙШНАЛ» ДАР БАРНОМАИ БАЙНАЛХАЛҚИ ШИРКАТ МЕВАРЗАД

       Душанбе, 4  декабр. (АМИТ «Ховар», Бекназари  Абӯбакр). – Созмони   қарзҳои  хурди «Имон интернейшнал» — и  Тоҷикистон аз  ҷумлаи  25  созмони  молиявӣ  ва  қарздиҳандаи  ҷаҳон  гардид, ки   дар  барномаи  тадқиқотии «Қарзҳои  хурд  барои  кори  пуршараф»  иштирок  менамояд. Озмун   барои иштирок  дар ин  барнома  моҳи  июн  эълон  шуда буд. Барномаро Созмони  байналмилалии меҳнат  ҳамроҳи Пажӯҳишгоҳи  байналхалқии  молиявии Ойкокредит амалӣ  месозад. Ҳадафи  асосии  барнома  беҳтар  сохтани  шароити  кори  мизоҷон,   муҳайё  сохтани  ҷойҳои  нави  корӣ ва  то  ҳадди  имкон  кам  кардани  истифодаи  меҳнати  бачагон  мебошад. Барнома  то  соли  2011  дар  се  давра  амалӣ  карда  мешавад.