ИШТИРОКИ ШИРКАТҲОИ ПОЛША ДАР СОХТМОНИ НЕРӮГОҲҲОИ ХУРДИ ҶТ

Душанбе. 3 декабр. (АМИТ «Ховар», Покиза Маҳмадбекова). —  Дирӯз дар Палатаи савдо ва саноати Ҷумҳурии Тоҷикистон раиси Палатаи савдо ва саноати ҷумҳурӣ Шариф Саид ва ноиби раиси Палатаи савдо ва саноати Полшаву Туркия Грзегорс Кобилетский вохӯрӣ гузарониданд. Миёни ин палатаҳо Созишнома ба имзо расид. Тавре ба мухбири АМИТ «Ховар» аз Палатаи савдо ва саноати ҷумҳурӣ хабар доданд, санади мазкур фарогири ҳамкорӣ дар ҳамаи соҳаҳо мебошад. Дар ҷараёни мулоқот масъалаҳои иштироки ширкатҳои Полша дар фаъолияту рушди бахши кишоварзии ҷумҳурӣ, сохтмони нерӯгоҳҳои хурд ва истихроҷи ангишт дар Тоҷикистон мавриди баррасӣ қарор гирифт.