М. БА УБАЙДУЛЛОЕВ БО САФАРИ РАСМӢ ЧИН РАФТ

          Душанбе, 1 декабр. (АМИТ «Ховар», Марзия Саидова).-Субҳи 1-уми декабри соли 2008  Раиси Маҷлиси миллии Маҷлиси Олии Ҷумҳурии Тоҷикистон  Маҳмадсаид Убайдуллоев бо сафари расмӣ ба Ҷумҳурии Мардумии Чин рафт. Тибқи иттилои ёвари раиси палатаи болоии парлумони мамлакат Шавкат Саидов,  сафари Маҳмадсаид Убайдуллоев ба Чин то 6 –уми декабр идома меёбад. Раиси палатаи болоии парлумони Тоҷикистон зимни сафар ба Чин бо роҳбарони воломақоми Чин, аз ҷумла Раиси Кумитаи Доимии Маҷлиси Умумихитойии Намояндагони Халқи Ҷумҳурии Мардумии Чин У Банго, президенти ЭКСИМБОНК Ли Жогу, Раиси Кумитаи Доимии шаҳри Шанхай Лю Юнгин дидору мулоқот намуда, масъалаҳои  ба роҳ мондан ва тақвияти ҳамкории байнипарлумонии Тоҷикистону Чинро баррасӣ менамояд. Зимни ин сафар ба Ҷумҳурии Мардумии Чин Маҳмадсаид Убайдуллоевро раисони кумитаҳои марбутаи Маҷлиси миллӣ ва дигар шахсони расмӣ ҳамроҳӣ мекунанд.