МАҲСУЛОТИ КДММ «ШАРБАТҲО» ХАРИДОРИ ЗИЁД ДОРАД

            Душанбе, 26 декабр. (АМИТ «Ховар», Мавзуна Бойева).- Тибқи иттилои раиси КДММ «Шарбатҳо» Мирзоалӣ Холов, корхонаи мазкур соли чорум аст, ки ба истеҳсоли шарбату консерва машғул аст.            Корхона бо Агентии таъмини амволи махсуси назди Вазорати рушди иқтисод ва савдои ҷумҳурӣ ҳамкорӣ дорад. Он бо технологияи муосир муҷаҳҳаз гардонида шудааст. Айни замон корхона 18 навъи маҳсулоти шарбатию консервакардашудаи меваю сабзавотро ба роҳ мондааст. Корхона танҳо дар соли 2007 ба Агентии таъмини амволи махсуси назди Вазорати рушди иқтисод ва савдо ба маблағи 150 ҳазор сомонӣ маводи хӯрока, аз ҷумла, шарбати помидор, консерваи пиёзи анзур, бодиринг ва мураббои себу зардолу ба фурӯш баровард.            Имсол бошад, маҳсулоти истеҳсолкардаи корхона нисбат ба соли 2007 хеле зиёд аст ва харидори бештар дорад.