МУЛОҚОТИ РАИСИ ВИЛОЯТИ ХАТЛОН БО ВЛАДИМИР ПРЯХИН

         Қӯрғонтеппа,  16  декабр. (АМИТ «Ховар»,    Мурод  Сотиев). – Зимни   мулоқоти   раиси  вилояти  Хатлон  Ғайбулло  Авзалов  бо  роҳбари Маркази  Созмони  амнияту  ҳамкории  Аврупо  дар  Душанбе  Владимир  Пряхин  масъалаҳои  ҳамкории  маъмурияти  вилоят   бо  Маркази  САҲА   мавриди  баррасӣ  қарор  гирифтанд. Раиси  вилоят   дар  бораи    рушди   иҷтимоию  иқтисодии  вилоят  маълумот  дода,   зикр  намуд,  ки  роҳбарияти он  барои  афзун  гардондани  дастовардҳо  дар  соҳаҳои  гуногуни  иқтисодиёт  тадбирҳои  самарабахш  меандешад. Ғ.Авзалов  пешрафти  соҳаҳои  саноат  ва  энергетикаро  махсус  таъкид  кард. В.Пряхин изҳор  намуд, ки Маркази САҲА дар  Душанбе  ба  амалӣ   сохтани  барномаҳое мусоидат  мекунад, ки  ба  пешрафти  иқтисодиёти  минтақа  кӯмак  мерасонанд. Ӯ  дар  замина  ба  ҳалли  барномаҳои  экологӣ  таваҷҷӯҳи  махсус  зоҳир  намуд.