РИШВАХӮРӢ БА ЗУҲУРОТИ МАНФИИ ДОРОИ ХУСУСИЯТИ БАЙНАЛМИЛАЛӢ ТАБДИЛ ЁФТААСТ

            Душанбе,  12  декабр. (АМИТ «Ховар»,  Мавҷуда   Давлатзода,  Фарангис  Раҳимова). –  Имрӯз   дар  Кохи  Ваҳдат  дар  мавзӯи  «Таҷрибаи  мамлакатҳои  Аврупо  ва  Осиёи  Марказӣ   дар  бобати  истифодаи  агентиҳои  махсуси мубориза ба  муқобили  ришвахӯрӣ»  машварат  баргузор  гардид. Онро  Агентии  назорати  давлатии  молиявӣ  ва  мубориза  ба  муқобили  ришвахӯрии  Ҷумҳурии  Тоҷикистон  ҳамроҳи  Муассисаи  рушди  СММ гузаронд. Директори агентӣ Шерхон  Салимзода  дар  ҳузури  ҷамъомадагон   зикр кард,  ки  имрӯз  ришвахӯрӣ  ба  зуҳуроти  манфии  байналмилалӣ  табдил  ёфта,   ба  чомеа  ва  иқтисодиёти  ҳамаи  мамлакатҳо  зарари  калон мерасонад. Қайд  карда  шуд, ки   ришвахӯрӣ  дар  Тоҷикистон  яке  аз  монеаҳои  асосии  фаъолияти  мӯътадили  дастгоҳи   давлатӣ,  таъмини  фаъолияти  самарабахшу  шаффофи   созмонҳои  давлатию  ғайридавлатӣ,  таъмини  ҳуқуқу  озодии  инсон  ва  умуман   рушди  ҷомеа  мебошад. Ш.Салимзода  афзуд, ки   давраи  мақсадноки  мубориза  ба  муқобили  ришвахӯрӣ  дар  Тоҷикистон соли 1999 оғоз  ёфт ва  давраи  сифатан  нави  мубориза ба  муқобили  ин  зуҳуроти номатлуб  аз 25  сентябри  соли  2006  шурӯъ  гардид. Тоҷикистон  хамон сол  ба  Барномаи  СММ  бахшида ба   мубориза ба  муқобили   ришвахӯрӣ ҳамроҳ  гардид. Мухбири  АМИТ «Ховар»  хабар  медиҳад, ки  ҳадафи  асосии машварат  шиносоӣ бо  фаъолияти  Агентии   назорати  давлатии  молиявӣ  ва  мубориза  ба  муқобили  ришвахӯрӣ  ва  омӯзиши  таҷрибаи   мамлакатҳои  дигар  дар  ин  соҳа  мебошад.  Дар  машварат   намояндагони  Агентии  назорати  давлатии  молиявӣ, Муассисаи  рушди  СММ,  сафоратхонаҳо ва  коршиносону  мутахассисон   ширкат  варзиданд.