СӮҲБАТИ ТЕЛЕВИЗИОНИИ МУСТАҚИМИ РАИСИ ВИЛОЯТ

           Хуҷанд,  26  декабр. (АМИТ «Ховар»,  Санавбар Мақсудова). –  Раиси  вилояти  Суғд  Қоҳир  Расулзода  25  декабр   зимни  сӯҳбати  мустақими  телевизионӣ  ба  саволҳои  аҳолии  вилоят ҷавоб  дод.  Сокинони  вилоят   роҷеъ  ба  масъалаҳои бо қувваи  барқу  гази  табиӣ  таъмин  намудани   шаҳру  ноҳияҳо,  расондани  кӯмаки  молиявӣ  ба  оилаҳои  камбизоат  барои пардохти  пули   газу  барқ,  проблемаҳои  вобаста ба  таъминоти  об   ва  ғайра  саволҳо  доданд. Қ.Расулзода  изҳор  намуд,  сокинони   биноҳои  баландошёна, ки  пули  газро  пешакӣ  месупоранд,   тамоми   шабонарӯз  бо  газ таъмин  карда  мешаванд,  қувваи  барқ  ба  аҳолӣ  дар  як  шабонарӯз  17  соат  дода  мешавад.           Қайд  карда  шуд, ки  дар  давоми  соли оянда  барои  расондани  кӯмак   оилаҳои  камбизоат  барои пардохти  пули  газу барқ  10,8  миллион  сомонӣ  ҷудо  карда шудааст.  Дар  давоми  сол  чунин  кӯмак  ба  32  ҳазор  нафар  расонда  хоҳад  шуд.  Раиси  вилоят  дар  бораи  проблемаҳои  экологӣ  сухан  ронда,  гуфт, ки  дар  шаҳри  Конибодом  ва  ноҳияҳои  Ҷаббор  Расулов,  Бобоҷон Ғафуров ва  Спитамен  сатҳи оби  зеризаминӣ  баланд шудааст  ва  барои  паст  кардани он  тадбирҳо  андешида  мешаванд.           Қ.Расулзода  зикр  кард,  ки  соли  2008  соли  камоб  буд ва   минтақаҳои  зиёд  бо  ин  проблема  рӯ  ба  рӯ  гардиданд. Мухбири  АМИТ «Ховар»  хабар  медиҳад, ки  сӯҳбати  телевизионии  мустақими   раиси  вилоят  бештар  аз  1,5  соат  давом  кард.