СӮХТОР ДАР САФОРАТХОНАИ ИМА

            Душанбе, 27 декабр. (АМИТ «Ховар», Темур Бандишоев, Наргис Бойахмедова).- Дирӯз дар бинои сафоратхонаи Иёлоти Муттаҳидаи Амрико дар Душанбе сӯхтор ба амал омад. Сӯхтор, ба қавли шоҳидон, аз ошёнаи якуми бино сар шуд. Аз Раёсати сӯхторхомӯшкунии вазорати корҳои дохилии ҷумҳурӣ ба АМИТ «Ховар»  хабар доданд, ки  баробари расидани хабари сӯхтор ба маҳалли воқеа якчанд мошини сӯхторхомӯшкунӣ фиристода шуд. Ба қавли  мутахассисони вазорат, сабаби сар задани сӯхтор расиши кӯтоҳи  симҳои барқ дар ошхонаи сафорат мебошад. Корманди сафоратхонаи ИМА Нигина Алиева зикр намуд, ки  сӯхтор дар ошхонаи биное сар задааст, ки  дар он посбонони сафоратхона зиндагӣ мекунанд. Қайд карда шуд, ки  ба туфайли  тадбирҳои  фаврии  сӯхторхомӯшкунандагон, бар асари сӯхтор касе осеб надид.