ТАҶРИБАИ ҲАМКОРИИ РУСИЯ ВА ТУРКИЯ ДАР ОСИЁИ МАРКАЗӢ

         Маскав,  16  декабр. (АМИТ «Ховар»,  Ҳалима  Хушқадамова). –  Дар  Маскав  дар  мавзӯи «Таҷрибаи  ҳамкории  Русия  ва  Туркия дар Осиёи  Марказӣ ва  Қафқоз» конфронси  байналхалқии  илмии  амалӣ  баргузор  гардид. Шарқшиноси  маъруфи  Русия,  директори  Пажӯҳишгоҳи  мамлакатҳои Осиё  ва  Африқои Донишгоҳи   давлатии Маскав  ба  номи  Ломоносов М.Мейер зимни  суханрониаш,  аз  ҷумла,  зикр  кард, ки  мавзӯи  ҳамкориҳои  Русия  ва  Туркия   дар  Осиёи  Марказӣ  проблемаи  хеле  муҳим  ба  шумор  меравад.  Аввали  солҳои  90 – ум  дар муносибатҳои  Туркия  бо  мамлакатҳои  Осиёи  Марказӣ  як  навъ  эҳтиёткорӣ  ва ташвишу  изтироб  мушоҳида  карда  мешуд. Вале   имрӯз  вазъият   дар  ин  масъала  ба  куллӣ  тағйир  ёфтааст,  гуфт  вай. Таъкид  шуд, ки  айни   ҳол  нақши  созмони «Муколамаи  мамлакатҳои  Аврупою  Осиё» ва  маҷаллаи  фарҳангии  байналхалқии  «ДА» барои  ба  ҳам  наздик  шудан ва  муттаҳид  сохтани  халқҳои  минтақа  нақши  муҳим  мебозанд.  Дар  конфронс  олимону  коршиносони  Русия  ва  Туркия,  инчунин  намояндагони  Қазоқистон,  Украина, Тоҷикистон, Тайван, Қирғизистон ва  Озарбойҷон  ширкат  варзиданд.  Дар он  сафири  Туркия  дар  Федератсияи  Русия  Халил  Оқинҷи  сухан  кард.