В.ЮЩЕНКО БА Э. РАҲМОН ОРДЕНИ КНЯЗ ЯРОСЛАВ МУДРИЙ ДАРАҶАИ ЯКУМРО МЕСУПОРАД

        Душанбе, 3  декабр. (АМИТ «Ховар»,  Наргис  Бояхмедова). – Президенти  Ҷумҳурии  Тоҷикистон  Эмомалӣ Раҳмон, ки  субҳи  имрӯз  ба  Украина  рафта  буд,  дар  шаҳри  Лвов  бо раиси  маъмурияти   вилояти  мазкур  Н.Кмит  мулоқот  кард.  Сардори  давлати  Тоҷикистон  баъди  чошт  ба  Киев  парвоз  кард. Аз  Вазорати   корҳои  хориҷии ҷумҳурӣ  ба   АМИТ «Ховар»  хабар  доданд, ки Эмомалӣ  Раҳмон  дар  Киев  бо  Президенти  Украина  Виктор  Ющенко  мулоқот  хоҳад  кард.         Сарони  ҳар  ду  давлат  баъди  анҷоми  мулоқоти  якка  ба  якка  ба  ҳамдигар   мукофотҳои  давлатии  мамлакатҳояшонро   месупоранд. Президенти  Украина   ба  Президенти  Тоҷикистон  ордени Ярослав  Мудрий дараҷаи  аввал ва Президенти  Ҷумҳурии  Тоҷикистон  ба  Президенти  Украина  ордени  «Исмоили  Сомонӣ» — ро  ҳадя  мекунад. Баъдан   гуфтушуниди  ҳайатҳои  ҳар  ду  мамлакат  баргузор  мегардад. Дар  фарҷоми  он  силсилаи  ҳуҷҷатҳои  ҳамкорӣ  имзо  карда  мешаванд. Сипас сарони  ҳар  ду  давлат  дар  ҳузури  намояндагони  воситаҳои  ахбори оммавӣ  изҳорот   хоҳанд  дод. Хабар  дода  мешавад, ки  Эмомалӣ  Раҳмон инчунин  бо  муовини  аввали   раиси  Радаи  олии Украина  Александр  Лавринович  мулоқот  карда,  тибқи  барномаи  сафар  ба  Донишгоҳи   миллии  Киев  ба  номи  К. Шевченко  рафта,   бо   ректори он  мулоқот мекунад. Президенти  Тоҷикистон  инчунин   бо  намояндагони  тоҷикони  сокини  Украина  мулоқот  анҷом  хоҳад  дод. Баъдан,  тибқи  нақшаи  сафар,  Эмомалӣ  Раҳмон  дар  маросими   гузоштани  гулчанбар  ба Қабри Аскари  номаълум   иштирок  карда,  сипас  бо  ҳамроҳонаш  ба  шаҳри  Харков  меравад. Вай  дар  ин  ҷо  бо  иҷрокунандаи  муваққатии   раиси  вилояти  Харков  В. Бобоев  мулоқот  карда,   бо  фаъолияти  Ҷамъияти  саҳомии «Турбоатом» шинос  хоҳад  шуд.