ҲАҶМИ ИСТЕҲСОЛОТ НИГАРОНКУНАНДА АСТ

              Душанбе, 21 январ. (АМИТ «Ховар», Лаззат Диловарзод).- Президенти кишвар Эмомалӣ Раҳмон зимни таҳлилу баррасии натиҷаҳои рушди иҷтимоию иқтисодӣ дар ҷаласаи васеи Ҳукумати ҷумҳурӣ аз пастравии ҳаҷми истеҳсолот изҳори нигаронӣ намуд.             Тибқи маълумоти Кумитаи давлатии омор, дар соли 2008 маҷмӯи маҳсулоти дохилӣ ба 17 миллиарду 609,3 миллион сомонӣ ё баробари 7,9 фоиз афзудааст.             Ҳаҷми гардиши савдои хориҷӣ ба 4 миллиарду 549,6 млн. доллари амрикоӣ баробар шуд.Сатҳи таваррум дар соли 2008 ба 11, 8 фоиз расид, ки нисбат ба ҳаҷми маҷмӯи маҳсулоти дохилӣ ба андозаи 3,1 фоиз зиёд аст.             Сарвари давлат баҳри ислоҳи вазъият дастур дод, ки дар зарфи 12 рӯзи моҳи январи соли ҷорӣ нақша-чорабиниҳо баҳри дастгирии сохторҳои истеҳсолоти воқеӣ таҳия ва ба Ҳукумати ҷумҳурӣ пешниҳод гардад.