ҶАМЪБАСТИ НАТИҶАҲОИ СОЛИ ГУЗАШТА

         Душанбе,  6  январ. (АМИТ «Ховар»,  Фарангис  Раҳимова). – Дирӯз  маҷлиси  ҳайати  мушовараи  Кумитаи  давлатии   сармоягузорӣ  ва  идораи  амволи  давлатии   ҷумҳурӣ  баргузор  гардид. Дар  он натиҷаҳои  фаъолияти  кумита  дар соли   2008   ҷамъбаст  карда шуд. Раиси  кумита   Фаррух  Ҳамралиев   зикр  кард, ки  соли  гузашта  дар  Тоҷикистон  аз ҷониби  Ҳукумати  мамлакат  51 барнома   мавриди  истифода  қарор  дода шуд.  Ин  барномаҳо  дар 16 соҳаи  иқтисодиёти  мамлакат   мавриди  иҷро  қарор  гирифтанд. Қайд  карда  шуд, ки  маблағи  умумии  барномаҳои  сармоягузории  Ҳукумати  мамлакат  дар  соли   2008 – ум  5,2   миллиард  сомониро  ташкил  дод. Аз  ин  маблағ 3  миллиард  сомонӣ  сармоягузории  мустақимро  ташкил  медиҳад.