ДАР ЧИН ИСТЕҲСОЛИ МОЛ КОҲИШ ЁФТ

Пекин, 7 январ. (АМИТ «Ховар» — БИ-Би-Си).- Ҳаҷми истеҳсоли мол  дар корхонаҳои саноатии Ҷумҳурии Мардумии Чин дар давоми се моҳи охирини  соли 2008 хеле кам шуд. Ба қавли коршиносон, сабаби асосии  ин вазъият таъсири  бӯҳрони ҷаҳонии молиявӣ мебошад. Қайд карда мешавад, ки вақтҳои охир талабот ба молҳои сохти чинӣ, хусусан дар хориҷи кишвар хеле коҳиш ёфтааст. Бо вуҷуди тадбирҳои андешидаи ҳукумат, вазъи иқтисодии мамлакат торафт муташанниҷ мегардад. Бисёр корхонаҳо барои давом додани фаъолияташон коргаронро аз кор озод мекунанд.          Ба қавли раиси Ҷумҳурии Мардумии Чин Ху Сзинтао, дар натиҷаи бӯҳрони ҷаҳонии молиявӣ рақобатпазирии молҳои сохти Чин дар бозори ҷаҳонӣ коҳиш меёбад.