ДАР ЕКАТЕРИНБУРГ БА СӮИ ХОБГОҲИ МАРДИКОРОНИ ТОҶИК ОТАШ КУШОДА ШУД

                 Душанбе, 23 январ. (АМИТ «Ховар», Наргис Бояхмедова). — Баъзе рӯзномаҳо ва сайтҳои интернетӣ хабар доданд, ки дар ноҳияи Орҷоникидзеи шаҳри Екатеринбург шахсони номаълум ба сӯи хобгоҳи мардикорони тоҷик аз аслиҳаи оташфишон тирпарронӣ карданд. Дар натиҷа чанд нафар маҷрӯҳ гардид. Консули генералии Ҷумҳурии Тоҷикистон дар Федератсияи Русия Ф.Шарифов баъди боздид аз маҳалли воқеа ва сӯҳбат бо сардори шӯъбаи корҳои дохилии ноҳияи Орҷоникидзе ба АМИТ «Ховар» хабар дод, ки 12 январ гурӯҳи бистнафараи шахсони номаълум ба хобгоҳ зада даромада, шаҳрвандони тоҷикро лату кӯб кардаанд. Яке аз шаҳрвандони тоҷик Сироҷиддин Сафаров бо тири аслиҳаи пневматикӣ маҷрӯҳ гардид ва ҳоло дар шифохона табобат карда мешавад. Вазъи саломатии ӯ қаноатбахш аст. Айни ҳол 6 нафар бо гумони ҳамдастӣ дар ин амалиёт дастгир карда шуданд. Аз рӯи ин воқеа парвандаи ҷиноӣ кушода шуд.