САРМОЯГУЗОРОН АЗ ПАРДОХТИ АНДОЗИ МАҲАЛЛИ ОЗОД МЕШАВАНД?

               Душанбе, 20 январ.(АМИТ «Ховар», Марзия Саидова).- Дар соли равон дар пойтахт ба истифодадиҳии 150 ҳазор метри мураббаъ манзил ба нақша гирифта шудааст. То ҷашни 20-солагии Истиқлолияти давлатии ҷумҳурӣ ин нишондод солона то 200 ҳазор метри мураббаъ расонида хоҳад шуд.                Дар робита Раиси шаҳри Душанбе Маҳмасдаид Убайдуллоев дар ҷаласаи васеи Мақомоти иҷроияи маҳаллии ҳокимияти давлатии шаҳри Душанбе гуфт, ки — барои ноил гардидан ба ҳадафҳои созанда, шаҳрдорӣ бо мақсади ҷалби сармоягузорони ватанию хориҷӣ, пеш аз ҳама сармояҳои ҳамватанони бурунмарзӣ тамоми шароитҳоро фароҳам меорад. Баҳри ҳавасмандӣ роҳбарияти шаҳр омодааст, ки ҳамчун имтиёз онҳоро аз пардохти андозҳои маҳаллӣ озод намояд.                Раиси шаҳр масъулини соҳаро муваззаф сохт, ки барои ҳар чӣ зудтар ба анҷом расонидани таҳрири нави Нақшаи генералии шаҳр озмуни такрории баййналмилалӣ ҷиҳати дарёфту интихоби пудратчии он эълон намоянд. Ҳамзамон, М. Убайдуллоев ба масъулини Кумитаи заминсозӣ ва Сарраёсати меъморӣ ва шаҳрсозии пойтахт дастур дод, ки ҷиҳати интихоби қитъаи замин барои сохтмони 2 бинои 20 ошёна ҳамчун армуғони пойтахт ба ҷашни 20-солагии Истиқлолияти давлатии Ҷумҳурии Тоҷикистон ба унвонии раиси шаҳр пешниҳод ирсол созанд.