СУХАНРОНИИ НАМОЯНДАИ ДОИМИИ ТОҶИКИСТОН ДАР СММ

                    Душанбе, 27 январ. (АМИТ «Ховар», Наргис Бояхмедова). — Намояндаи доимии Ҷумҳурии Тоҷикистон дар Созмони Милали Муттаҳид Сироҷиддин Аслов дар маҷлиси СММ сухан карда, гуфт, ки бӯҳрони ҷаҳонии озуқа ба шароити зиндагии аз се ду ҳиссаи оилаҳои мамлакат таъсири манфӣ расонд. Вай зикр намуд, ки Тоҷикистон дар давоми солҳои 2007 — 2008 дар баробари болоравии нархи озуқа, ҳавои сарди зимистони қаҳратун ва камобиро аз сар гузаронд. Ин вазъият сабаби ба миён омадани бӯҳрони энергетикӣ ва озуқа гардид.                     Соли 2008 дар Тоҷикистон нархи қисми зиёди навъҳои озуқа баланд гардид, аз ҷумла, нархи биринҷ 73 фоиз, нархи шир 43,8 фоиз, нархи гӯшти гов 24,6 фоиз ва нархи картошка 8 фоиз баланд шуд. С.Аслов изҳор намуд, ки Ҳукумати Тоҷикистон барои ҳалли проблемаҳои мавҷуда бо назардошти захираю имкониятҳои худ кӯшиш ба харҷ медиҳад.                      Ба Тоҷикистон барои таъмини фаъолияти соҳаҳои ҳаётан муҳим — маориф ва тандурустӣ, инчунин пешрафти соҳаҳои ёрирасони фаъолияти давлатӣ, кишоварзӣ ва таъмини амнияти озуқа кӯмаки байналхалқӣ зарур аст, — гуфт вай.                      С.Аслов пешниҳод намуд, ки ҳамроҳи СММ, созмонҳои дигари байналхалқӣ ва мамлакатҳои мададгори Тоҷикистон барои амалӣ сохтани Барномаи миллии стратегии рушди Тоҷикистон дар давраи солҳои 2005 — 2015 нақшаи тадбирҳо таҳия карда шавад. Вай афзуд, ки Ҳукумати Тоҷикистон ба ҳамкорӣ бо мамлакатҳои шарику мададгор ва созмонҳои байналхалқӣ барои амалӣ сохтани барномаҳое манфиатдор мебошад, ки ба пешрафти иқтисодиёти мамлакат таъсири мусбат расонда тавонанд.                                                                                                                                  Тарҷумон — Қудратов А.