ТҶММ ТАЙЁРАҲОИ ХУДРО АЗ ТАЪМИРИ КАПИТАЛӢ МЕБАРОРАД

Душанбе, 12 январ. (АМИТ «Ховар», Мавҷуда Давлатзода).- «2 тайёраи АН-2 дар шаҳри Актубеи Ҷумҳурии Қазоқистон аз таъмири капиталӣ бароварда шуда, моҳи декабри соли 2008 ба фурӯдгоҳи шаҳри Хуҷанд оварда шуданд», қайд намуд зимни нишасти матбуотӣ раиси Кумитаи марказии Ташкилоти ҷамъиятии мададгори мудофиаи Ҷумҳурии Тоҷикистон Саиданвар Камолов. Қайд гардид, ки тайёраҳои мазкур тибқи Қарори Ҳукумати Ҷумҳурии Тоҷикистон №324 аз 20 июни соли 2007 ва супориши №108- Ф аз 29 сентябри соли 2008 ба Вазорати кишоварзӣ ва ҳифзи табиат аз ҳисоби маблағҳои буҷети ҷумҳуриявӣ бо арзиши 894280 сомонӣ харидорӣ шуданд. Бақияи маблағи ҷудошуда бошад то 29 декабри соли 2008  14599 сомониро ташкил дода, он дар суратҳисоби Бошгоҳи ҷумҳуриявии ҳавопаймоии ТҶММ — и Ҷумҳурии Тоҷикистон мебошад.