«ТОҶИКМАТЛУБОТ» СОДИРОТРО МЕАФЗОЯД

                 Душанбе, 26 январ. (АМИТ «Ховар», Бекназари Абӯбакр). — Дар давоми соли 2008 аз Тоҷикистон ба хориҷи кишвар зиёда аз 1 ҳазору 388 тонна сабзавот содирот шуд. Ин нуқтаро зимни нишасти матбуотӣ 26 январ, раиси Иттифоқи «Тоҷикматлубот» Сироҷуддин Валиев ба хабарнигорон итилоъ дод.                Ӯ афзуд, ки дар ин давра ба хориҷи кишвар, бахусус Федератсияи Россия, Ҷумҳурии Халқии Чин ва Ҷумҳурии Қазоқистон 31 тонна меваи тару тоза, 217 тонна меваи хушк, 110 тонна зироатҳои полизӣ, 60 тонна ангур, 695 ҳазор қуттии шартӣ консерва, 70 ҳазор дона пӯсти чорво ва 60 тонна пашм содирот шуд.                 Лозим ба зикр аст, ки Иттифоқи «Тоҷикматлубот» бо яке аз ширкатҳои бузурги Ҷумҳурии Мардумии Чин оид ба хариди таҷҳизоти шустушӯи пашм шартнома ба имзо расонд, ки дар як соат 550 килограмм ва дар як баст 4400 килограмм пашмро шустушӯ мекунад ва ҳамзамон, бо бастабандии 100 килограмм пресс менамояд.