ВОМБАРГҲОИ ҶТ БА МУОМИЛОТ БАРОВАРДА МЕШАВАНД

                 Душанбе, 28 январ. (АМИТ «Ховар», Покиза Маҳмадбекова). — Вомбаргҳои Ҷумҳурии Тоҷикистон аз якуми марти соли 2009 то якуми марти соли 2019 ба мӯҳлати 10 сол ба муомилот бароварда мешаванд.                 Аз рӯи иттилоъи Вазорати молияи ҷумҳурӣ, вомбаргҳои нав бо арзиши 10 ва 20 сомонӣ ба мӯҳлати 10 сол ба муомилот бароварда шуда, бурдҳояшон ба андозаи аз 20 то 1500 сомонӣ муқаррар гардидааст. Ин коғазҳои қиматнок феълан дар як ширкати олмонӣ, ки пулҳои миллии Тоҷикистон — сомонӣ низ дар он нашр шудааст, чоп мегарданд.                  Бояд гуфт, ки Вомбаргҳо дар соли 2009 аз тарафи муассисаҳои бонки давлатии амонатгузории «Амонатбонк» озодона фурӯхта ва харида мешаванд. Дорандагони вомбаргҳои давлатии дохилии бурдноки барориши соли 2002 аз 1-уми марти соли 2009 метавонанд вомбаргҳои худро ё ба намунаҳои нав иваз кунанд ва ё маблағи онҳоро бозпас гиранд. Тиражи навбатии 41-уми бозиҳои вомбаргҳои давлатии дохилии бурдноки барориши соли 2002 дар бинои Вазорати молияи ҷумҳурӣ 30-уми январ баргузор мегардад.                Мавриди зикр аст, ки маълумот аз рӯи бурдҳои вомбаргҳои барориши соли 2009, ки ба аҳолӣ пардохт шудаанд, аз ҷониби БДА «Амонатбонк» ба Вазорати молияи ҷумҳурӣ ҳар моҳ пешниҳод мегардад.