АРЗИШИ ДОЛЛАР НИСБАТ БА ПУЛИ МИЛЛӢ БАЛАНД МЕШАВАД

                     Душанбе, 5 феврал. АМИТ «Ховар», Бекназари Абӯбакр). — Дар Тоҷикистон рӯзҳои охир арзиши пули миллӣ нисбати пулҳои хориҷӣ, хусусан доллари ИМА хеле паст гардид. Имрӯз як доллари ИМА ба 3 сомонию 90 дирам баробар шудааст. Мухбири АМИТ «Ховар» аз мутахассисони Бонки миллии ҷумҳурӣ хоҳиш намуд, ки сабабҳои ин вазъиятро шарҳ диҳанд.                     Қайд карда шуд, ки болоравии арзиши доллар нисбат ба сомонӣ ба афзудани талабот ба пули хориҷӣ вобаста мебошад. Инчунин, хабарҳои воҳимаангез дар бораи бӯҳрони ҷаҳонии молиявӣ ва бар асари он болоравии арзиши доллари ИМА ин вазъиятро пуршиддат мегардонанд. Дар заминаи натиҷаҳои нисбатан устувори макроиқтисодии мамлакати мо чунин болоравии арзиши доллар асоси воқеӣ надорад. Ҳол он ки бо назардошти вазъияти тавозуни тиҷорат ва тағйироти мавсимии талаботи бозор, хусусан дар мамлакатҳои минтақа нисбатан паст шудани қурби сомонӣ дар натиҷаи рӯйдодҳои охирин имконпазир мебошад.                    Бояд гуфт, ки аҳолӣ аз овозаҳои беасос хулосаи нодуруст бароварда, маблағи зиёди пулро захира намуда, ниҳояти кор зарари калон дида метавонад. Зеро вазъияти ба амал омада хусусияти муваққатӣ дорад.                     Бонки миллӣ вазъияти бозори дохилию берунии хариду фурӯши пулро муттасил назорат карда, ҳамаи воситаҳои мавҷударо истифода мебарад, ки қурби пули миллӣ устувор нигоҳ дошта шавад. Бонк аз миёнаҳои моҳи декабри соли гузашта сар карда, маблағи зиёди пули хориҷиро ба фурӯш баровард. Ҳоло ҳар рӯз аз як то яку ним миллион доллари ИМА фурӯхта мешавад.                    Бонки миллӣ барои таъмини устувории қурби пули миллӣ маблағи кифоя дорад. Инчунин, бо баъзе созмонҳои байналхалқии молиявӣ мувофиқа карда шудааст, ки дар мавриди зарурат барои таъмини эҳтиёҷоти мо маблағ ҷудо хоҳанд кард.