МАБЛАҒҲОРО САРФАКОРОНА БОЯД ИСТИФОДА КАРД

                   Душанбе, 3 феврал. (АМИТ «Ховар», Покиза Маҳмадбекова). — Дар давоми соли 2008 — ум аз ҳисоби Фонди захиравии Президенти Ҷумҳурии Тоҷикистон барои рушди соҳаҳои иҷтимоию иқтисодӣ 59,5 миллион сомонӣ, аз ҳисоби Фонди хароҷоти пешбинишудаи Ҳукумати Ҷумхурии Тоҷикистон барои таъмиру барқарор намудани иншооти аз офатҳои табиӣ зарардидаи хоҷагии халқи ҷумҳурӣ 20 миллион сомонӣ ва аз дигар манбаҳои захиравии молиявӣ барои рушди соҳаҳои маориф, тандурустӣ, фарҳанг, ҳифзи иҷтимоӣ ва дигар иншооти муҳими давлатӣ 87 миллион сомонӣ маблағҳои иловагӣ ҷудо карда шуда, пурра маблағгузорӣ карда шуд. Барои рушди соҳаи иҷтимоӣ махсусан, маориф, тандурустӣ, ҳифзи иҷтимоиии аҳолӣ, фарҳанг ва хоҷагии манзилии коммуналӣ аз буҷет 1,9 миллиард сомонӣ равона карда шуд.                    Аз рӯи иттилои Вазорати молияи ҷумҳурӣ, дар соли сипаригардида барои бехатарии озуқаворӣ ва рушди соҳаи кишоварзӣ 320 миллион сомонӣ равона карда шуд. Дар баробари ин, аз ҳисоби буҷети давлатӣ барои дастгирии системаи бонкӣ ва рушди соҳаи пахтакорӣ 140 миллион сомонӣ ҷудо гардида, пурра маблағгузорӣ карда шуд, ки аз ин маблағҳо то имрӯз 30,2 миллион сомонӣ ба буҷет баргардонида шуд.