НАХУСТИН ШАБИ ЭҶОДИИ ТОҲИРҶОН ҶӮРАЕВ

                 Душанбе, 16 феврал. (АМИТ «Ховар», Бекназари Абӯбакр). — Бо ибтикори Вазорати фарангӣ кишвар 15 феврали соли ҷорӣ дар Филармонияи давлатии ба номи Акашариф Ҷӯраев шаби эҷодии овозхони ҷавону умедбахш Тоҳирҷон Ҷӯраев баргузор гардид.                 Ин нахустин шаби эҷодии Т. Ҷӯраев буд, ки дар он олимону адибон ва устодони санъату аҳли ҳунар иштирок ва роҷеъ ба паҳлӯҳои мухталифи ҳунари ин санъаткори ҷавон суханронӣ карданд. Аз ҷумла, нависандаи маъруфи кишвар Урун Кӯҳзод гуфт, ки аз нахустин шаби эҷодии Тоҳирҷон бармеояд, ки дар сурудаҳои ӯ шеъру ғазалҳои баландмазмун аз эҷодиёти шоирони классик ва муосир истифода шудааст, ки аз мавқеи арзандаи ӯ дар ин самт дарак медиҳанд.                 Ҳунарманди халқии ИҶСШ Ҷӯрабек Муродов ба ҳунари овозхони ҷавон баҳои мусбат дода, изҳор кард, ки Тоҳирҷон Ҷӯраевро аз даврони донишҷӯияш мешиносадщ, ки нисбат ба санъат шавқи беандоза дошта, яке аз шогирдони боистеъдоди мактаби ӯст.                Гуфтанист, ки Тоҳирҷон Ҷӯраев шогирди ҳунарпешаи мардумии Тоҷикистон Афзалшоҳ Шодиев аст ва эҷодиёти ӯ бо ин овозхони маъруфи ҷумҳурӣ хеле вобастагӣ дорад. Афзалшоҳ Шодиев доир ба малакаю маҳорати шогирдаш гуфт, ки бо вуҷуди пешравиҳои назаррас дар эҷодиёти ин овозхони ҷавон камбудиҳо низ мавҷуданд, ки иллаташ ҷавон будани ӯст. Вале, гуфт ӯ дар байни шогирдон Тоҳирҷон бо овоз ва сатҳи касбиаш мақоми хос дорад.