ПЕШГӮИҲОИ ПАЙҒАМБАРОНАИ САРВАРИ ДАВЛАТ

                  Душанбе, 2 феврал. (АМИТ «Ховар», Лаззат Диловарзод).- Дар яке аз конфронсҳои байналмилалӣ Президенти кишвар Эмомалӣ Раҳмон аз минбари баланд иброз доштанд, ки дар оянда нархи об аз нафту тилло зиёдтар хоҳад шуд. Аз ин гуфтаҳо вақти зиёде нагузашта бошад ҳам, олам ба ин мушкилот рӯ ба рӯ гардид.                   Имрӯз чоряки аҳолии давлатҳои Африқо ва Осиё, аз он ҷумла давлатҳои Осиёи Миёна ҳам танқисии обро ҳис мекунанд.                  Соли 2008 дар вилояти Суғд 5 ҳазор гектар замин аз гардиши кишоварзӣ монд. Дар вилоят ҳосилнокии заминҳо бо сабаби нарасидани об 13,9 сентнерӣ кам шуд. Танҳо дар ноҳияи Конибодом 107 чоҳҳои амудии обкашӣ мавҷуд аст, ки то имрӯз ҳамагӣ 14-тои он таъмир карда шудааст.                  Агар вазъият чунин давом кунад, дар вилояти Суғд вазъи боғдорию сабзавоткорӣ, пахтакорию ғаллакорӣ чун соли 2008 боқӣ монда, боз аз сабаби норасоии об ҳазорҳо гектар замини обӣ аз гардиши кишоварзӣ берун хоҳад монд, ки маблағи он ба даҳҳо миллион сомонӣ баробар хоҳад шуд.                  Вазорати мелиоратсия ва захираҳои оби ҷумҳурӣ дар бораи таъмини хоҷагиҳои кишоварзӣ бо об то имрӯз гузоришеро тавассути расонаҳои хабарӣ пахш накардааст.