ТАШРИФИ ПРЕЗИДЕНТИ ЛАТВИЯ БА ТОҶИКИСТОН

                 Душанбе, 25 феврал. (АМИТ»Ховар», Наргис Бояхмедова).- Президенти Латвия Валдис Затлерс бо даъвати Президенти Ҷумҳурии Тоҷикистон Эмомалӣ Раҳмон дар давоми соли равон барои боздиди давлатӣ ба Тоҷикистон меояд. Мухбири АМИТ «Ховар» ёдовар мешавад, ки Президенти Ҷумҳурии Тоҷикистон Эмомалӣ Раҳмон 8 феврали соли равон ба Латвия сафари расмӣ анҷом дод. Зимни сафар Изҳороти муштараки сарони давлатҳои Тоҷикистону Латвия, Созишномаи байниҳукуматӣ дар бораи сарфи назар кардани андозбандии дубора ва пешгирии саркашӣ аз напардохтани андози даромад ва сармоя, Протоколи ҳамкории вазоратҳои корҳои хориҷии ҳар ду мамлакат ва Созишномаи хамкории палатаҳои тиҷоратию саноатии ҳар ду кишвар имзо шуданд.                  Инчунин, ҳукуматҳои Тоҷикистон ва Латвия дар бораи кушодани роҳи ҳавоӣ байни ҳар ду мамлакат созишнома имзо карданд. Мувофиқи он, ҳавопаймоҳои ширкати ҳавонавардии «Айрбалтик» аз 1 июни соли 2009 сар карда, дар байни шаҳрҳои Рига ва Душанбе парвоз мекунанд. Ширкати мазкур аввалин ширкати мамлакатҳои аъзои Иттиҳоди Аврупо хоҳад гашт, ки ҳавопаймоҳои он ба Душанбе парвоз мекунанд. Тибқи паймони ба даст омада ҳавопаймоҳои мусофирбар аз Рига ба Душанбе ҳар ҳафта ду маротиба, рӯзҳои душанбе ва ҷумъа парвоз хоҳанд кард.                   Парвози ҳавопаймоҳо панҷ соату 30 дақиқа давом мекунад. Ёдовар мешавем, ки Эмомалӣ Раҳмон дар Латвия изҳор карда буд: «Шумо роҳи моро ба Аврупо мекушоед, мо Шуморо ба Осиёи Марказӣ ва Ҷанубӣ раҳнамоӣ хоҳем кард!».