ҶАШНВОРАИ БАЙНАЛХАЛҚИИ КИНО ДАР ХОРУҒ

                       Душанбе, 16 март (АМИТ «Ховар», Людмила Дубинина). — Дар маркази Вилояти Мухтори Кӯҳистони Бадахшон — шаҳри Хоруғ ҷашнвораи байналхалқии кино таҳти унвони «Ду марҳала» оғоз ёфт. Дар он киносозони панҷ мамлакати Осиёи Марказӣ иштирок доранд. Роҳбари филиали Донишгоҳи Осиёи Марказӣ дар Хоруғ Диловар Бӯтабеков хабар дод, ки дар ҷашнвора даҳ филми пурраметражи бадеӣ аз Қазоқистон, Қирғизистон, Туркманистон, Ӯзбекистон ва Тоҷикистон намоиш дода мешаванд. Ҳамаи ин филмҳо ҳам дар замони шӯравӣ ва ҳам баъди мустақил гардидани ҷумҳуриҳои Осиёи Марказӣ ба навор гирифта шудаанд.                       Ҷашнвора имкон медиҳад, ки ба эҷодиёти таҳиягарони филмҳо баҳо дода шавад. Тамошобинон инчунин, бо хусусиятҳои зиндагии халқҳои мамлакатҳои дигар аз наздик шинос мегарданд, гуфт Д.Бӯтабеков.