ДОНИШҶӮЁН БО ИДРОРПУЛИИ МАХСУС САРФАРОЗ ГАРДОНИДА ШУДАНД

                   Душанбе, 30 март. (АМИТ «Ховар», Лутфия Эшонқулова).-Бо ташаббуси Кумитаи кор бо ҷавонон, варзиш ва сайёҳии назди Ҳукумати Ҷумҳурии Тоҷикистон дар Маркази фарҳангии ҷавонон «Ориёно» бо донишҷӯёни ноҳияи Тоҷикобод, ки тибқи квотаи президентӣ дар мактабҳои олии пойтахт таҳсил менамоянд, мулоқот баргузор гардид. Дар он вазири маорифи ҶТ Абдуҷаббор Раҳмонов, раиси ноҳияи Тоҷикобод Махсум Фозилов, мудири шӯъбаи илм ва маорифи Дастгоҳи иҷроияи Президенти ҶТ Ҳамидулло Фақиров, раиси Кумитаи кор бо ҷавонон, варзиш ва сайёҳии назди Ҳукумати ҶТ Маликшо Неъматов, омӯзгорон ва донишҷӯёни макотиби олии пойтахт иштирок намуданд. Дар мулоқот сухан дар бораи таҳсили донишҷӯён ва сатҳи дониши онҳо рафт. Зикр гардид, ки нисбат ба солҳои гузашта, сифати донишандӯзии донишҷӯён хеле беҳтар гардидааст ва онҳо имрӯз бо хобгоҳ таъминанд.                    Тавре ба мухбири АМИТ «Ховар» ноиби ректор оид ба корҳои тарбиявии Донишгоҳи давлатии омӯзгории Тоҷикистон ба номи С. Айнӣ Марҳабо Олимова хабар дод, 4 нафар донишҷӯёни аълохон, сазовори идрорпулии махсуси таъсиснамудаи раиси ноҳияи Тоҷикобод гаштанд.                  Мулоқоти навбатӣ бо донишҷӯёни ноҳияи Нуробод, пагоҳ 31 март дар Кумитаи кор бо занон ва оилаи назди Ҳукумати ҶТ доир мегардад.