ФАЪОЛОНИ ДИНӢ ДАР КОҲИШИ ВИЧ/СПИД САҲМ МЕГИРАНД

                 Душанбе, 5-ми март. (АМИТ «Ховар», Ибодат Давлатова). — Имрӯз созмони ҷамъиятии «Маркази саломатии рўҳӣ ва ВИЧ/СПИД» дар ҳамдастӣ бо вазоратҳои тандурустӣ ва фарҳанг, Донишгоҳи Исломии Тоҷикистон ва кӯмаки молиявии Созмони байналмиллалии «АСТ Сentral Asia» дар доираи лоиҳаи «Ислом хушунат ба гирифторони ВИЧ/СПИД-ро маҳкум мекунад» ҳамоишеро бо фаъолони динии шаҳри Душанбе ва Кӯлоб барпо намуд.                  Тавре ба мухбири АМИТ «Ховар» аз маркази матбуоти Вазорати тандурустии Ҷумҳурии Тоҷикистон хабар доданд, дар ҳамоиш намояндагони вазоратҳои тандурустӣ, фарҳанг, маориф, меҳнат ва ҳифзи иҷтимоии аҳолӣ, ҳамчунин як қатор созмонҳои байналмиллалӣ ширкат варзиданд. Ҳадаф аз нишасти мазкур мусоидати фаъолони динӣ дар роҳи пешгирии ВИЧ/СПИД дар Тоҷикистон мебошад. Ба андешаи барпокунандагони ҳамоиш имрӯз ҳангоми доман фарох кардани ВИЧ/СПИД дар минтақа ва ҷаҳон саҳмгирии роҳбарони динӣ дар пешгирии ин беморӣ ва мубориза бо поймоли ҳуқуқҳои гирифторон тадбирҳои амалишавандаро тақвият хоҳад дод. Раҳбарони динӣ қодиранд бо иқдоми худ ба коҳиши ВИЧ/СПИД мусоидат намоянд.                 Дар фарҷоми ҳамоиш филми ҳуҷҷатии «Подоши қисмат» манзури иштирокдорон гардид, ки дар доираи лоиҳаи мазкур ба навор гирифта шудааст. Филм аз ҳаёти шахси гирифтори ВИЧ ва нақши фаъолони динӣ дар роҳи пешгирӣ ва мубориза бо ВИЧ/СПИД ҳикоят мекунад.                 Дар назар аст, ки филми мазкур моҳҳои март ва апрели соли ҷорӣ тавассути Шабакаи якуми телевизиони Тоҷикистон пахш гардад.