ГУЗОРИШИ МУФАССАЛ АЗ ҶАРАЁНИ САФАРИ РАСМИИ Э. РАҲМОН БА МУҒУЛИСТОН

                    Шоми рӯзи 26 март Президенти Ҷумҳурии Тоҷикистон Эмомалӣ Раҳмон ба фурӯдгоҳи байналмилалии пойахти Муғулистон — шаҳри Улан-Батор фурӯд омад.                    Дар фурӯдгоҳ Сарвари давлати Тоҷикистон Эмомалӣ Раҳмонро тибқи муқаррароти сафарҳои расмӣ ва бо ифодаи эҳтиром гарму самимӣ истиқбол гирифтанд.                    Мулоқоту гуфтушунидҳои расмӣ субҳи рӯзи 27 — уми март оғоз ёфтанд.                    Маросими бошукӯҳи истиқболи расмӣ дар назди Қасри Давлатии Муғулистон баргузор гашт.                    Президенти Ҷумҳурии Тоҷикистон Эмомалӣ Раҳмонро Президенти Муғулистон Намбарин Энхбаяр истиқбол гиифт.                     Маросими истиқболи расмӣ бо садо додани сурудҳои миллии ду давлат, гузориши фармондеҳи горди ифтихорӣ, гузаштан аз назди ҷузъу томҳои низомӣ ва арзи салом ба онҳо, эҳтиром овадан чониби парчамҳои давлатии ду кишвар ва шиносоӣ бо ҳайатҳои расмии ҳарду ҷониб ҷараён гирифт.                     Сипас мулоқоти хосаи сарони ду давлат — Эмомалӣ Раҳмон ва Намбарин Энхбаяр баргузор гашт.«Мо омодаем, ки ҳамгироии минбадаи худро бо дӯстони муғул дар чаҳорчӯби муносибатҳои дуҷониба ва ҳам дар доираи созмонҳои минтақавию байналмилалӣ густариш диҳем», — изхор дошт дар оғози сӯҳбат Президенти Ҷумҳурии Тоҷикистон Эмомалӣ Раҳмон.                     Яонагӣ ва ё наздикии мавқеъҳои ду давлат доир ба масоили асосии муносибатҳои минтақаию байналмилалӣ заминаи хуб барои рушди робитаҳои гуногунҷанба маънидод гардид.                     Ба густариши ҳамкорӣ дар чаҳорчӯби Созмони ҳамкории Шанхай, аз ҷумла дар самтҳои нақлиёту коммуникатсия, энергетика ва мубориза бо хатарҳои ҷахони муосир таваҷҷӯҳи зиёд зоҳир карда шуд.                     Чорводорӣ, захира ва коркарди саноатии маҳсулоти гӯшту шир ва пашму пӯст аз самтҳои асосии ҳамкории иқтисодию тиҷоратии ду кишвар арзёбӣ шуд.                     Миёни ду кишвар таъсис додани комиссияи муштараки ҳамкориҳои иқтисодӣ зарур шумурда шуд.Эмомалӣ Раҳмон Намбарин Энхбаярро даъват намуд, ки ба Тоҷикистон бо сафари расмӣ ташриф биёрад.                    Масоили таҳкиму густариши ҳамкориҳои ду кишвар дар гуфтушиниди расмӣ бо иштироки ҳайатҳои ҳарду ҷониб ба таври муфассал баррасӣ шуд.                    Баъди музокироти расмӣ бо иштирок ва дар ҳузури сарони ду давлат як зумра санадҳои ҳамкорӣ ба имзо расид.                    Зери Баёнияи муштараки Президенти Ҷумҳурии Тоҷикистон ва Президенти Муғулистон оид ба принсипҳои асосии муносибатҳои ду давлат сарони давлатҳо — Эмомалӣ Раҳмон ва Намбарин Энхбаяр имзо гузоштанд.                     Ҳамчунин ба имзо расид:                    — Cозишнома миёни Ҳукумати Ҷумҳурии Тоҷикистон ва Ҳукумати Муғулистон оид ба ҳамкориҳои иқтисодӣ-тиҷоратӣ;                    — Созишнома миёни Ҳукумати Ҷумҳурии Тоҷикистон ва Ҳукумати Муғулистон оид ба ҳавасмандгардонӣ ва ҳифзи мутақобилаи сармоягузорӣ;                    — Созишнома миёни Ҳукумати Ҷумҳурии Тоҷикистон ва Ҳукумати Муғулистон оид ба ҳамкорӣ дар соҳаи байторӣ;                    — Созишнома миёни Ҳукумати Ҷумҳурии Тоҷикистон ва Ҳукумати Муғулистон оид ба ҳамкорӣ дар соҳаи карантин ва ҳифзи растаниҳо;                    Дар охир сарони ду давлат — Эмомалӣ Раҳмон ва Намбарин Энхбаяр нишасти матбуотӣ ороста, аз натиҷаҳои мулоқотҳои расмӣ изҳори қаноатмандӣ карданд.                    «Мо барои рушди воқеии ҳамкориҳои дуҷониба заминаи кофии қарордодӣ-ҳуқуқӣ муҳайё намудем», -баён кард Президенти Ҷумҳурии Тоҷикистон Эмомалӣ Раҳмон ва изҳори боварӣ намуд, ки натиҷаҳои ин сафар, аз ҷумла санадҳои имзошуда, барои густариши ҳамкориҳои ба ҳарду ҷониб судбахш роҳи васеъ мекушоянд. Дар ин бора ба АМИТ «Ховар» Котиби матбуоти Президенти Ҷумҳурии Тоҷикистон Абдуфаттоҳ Шарифзода аз шаҳри Улан-Батори Муғулистон иттилоъ дод.