КОРХОНАИ «САДРАНГ» ИСТЕҲСОЛОТРО РАНГИН СОХТ

                   Кӯлоб, 10 март. (АМИТ «Ховар», Сулаймон Холов).-«ҶДММ «Садранг»-и шаҳри Кӯлоб ҳаҷми маҳсулоташро дар муддати 2 моҳ 3 баробар зиёд намуд — гуфт директори корхона Неъматулло Азимов ва афзуд, ки корхонаи мазкур либосҳои ҳарбӣ, ҷиҳози ҷои хоб, болишт матрас, либоси занонаи беморӣ ва дигар навъи маҳсулот истеҳсол намуда дастраси мизоҷон мегардонад. Ба гуфтаи ин манбаъ аз тарафи Агентии таъминоти амволи махсус мувофиқи шартнома ба маблағи 50 ҳазор сомонӣ ба корхона пешпардохт намудааст. Маҳсулоти истеҳсолгардидаи корхона ба қисмҳои ҳарбӣ ва беморхонаҳо мувофиқи дархост таъмин мегардад. Корхона метавонад дар оянда 25 то 30 нафар занҳоро ба кор ҷалб намояд. Дар дохили корхона сехҳои пахтатозакунӣ, чилонгарӣ, таъмири мебел, шустушӯи автомобилҳо мавҷуд буда фаъолият менамоянд. «Мушкилоти асосии корхона танқисии қувваи барқ буда ба афзоиши ҳаҷми истеҳсолот таъсири манфӣ мерасонад»-иброз дошт Неъматулло Азимов.