МАҲФИЛИ НАВРӮЗӢ

                    Душанбе, 19 март. (АМИТ «Ховар», Лутфия Эшонқулова).- Имрӯз бо ташаббуси Сафоратхонаи Ҷумҳурии Исломии Эрон дар Тоҷикистон, Ройзании фарҳангии Ҷумҳурии Исломии Эрон дар Тоҷикистон ва Анҷумани дӯстии Тоҷикистону Эрон дар Китобхонаи миллии ба номи А. Фирдавсӣ маҳфили наврӯзӣ, бахшида иди Наврӯз баргузор гардид. Дар он Сафири кабири Эрон дар Тоҷикистон Алиасғари Шеърдӯст, Президенти Академияи Улуми ҶТ Мамадшо Илолов, раиси Анҷумани дӯстии Тоҷикистону Эрон Мирзо Муллоаҳмадов, директори Китобхонаи миллии ба номи А. Фирдавсӣ Шариф Тошев ва аҳли илму фарҳанги ҷумҳурӣ иштирок намуданд.                   Чоранибиро раиси китобхона Ш. Тошев ифтитоҳ намуда, ҳозиринро бо иди Наврӯзи ҳуҷастапай табрик намуд.                   Алиасғари Шеърдӯст дар сухани шодбошии худ аз рамзу суннатҳои Наврӯз ёдовар шуда, қайд намуд, ки Наврӯз дар Тоҷикистону Эрон 5000 ҳазор сол боз ҷашн гирифта мешавад ва онро дар 11 кишвар таҷлил менамоянд. Ӯ зикр намуд, Наврӯз моро ба соли нав ҳидоят мекунад ва тавони тоза медиҳад, то ки аз саховати табиат гавҳари зиндагӣ дарёбем.                  Сафир пешниҳод намуд, ки олимони се кишвари дӯст- Тоҷикистону Эрону Афғонистон барои созмон додани силлсилатаҳқиқҳо дар бораи Наврӯз гурӯҳи корӣ ташкил намоянд ва оинҳои наврӯзии на танҳо ин кишварҳоро балки тамоми «Ҳавзаи тамаддуни наврӯзӣ», ки ба он Ӯзбекистону Туркманистон, Қирғизистону Қазоқистон ва Озарбойҷон шомиланд ва ин расму оинҳо аз ҳамдигар андак тафовут доранд, зери таҳқиқ қарор гиранд.                  Раиси Анҷумани дӯстии Тоҷикистону Эрон Мирзо Муллоаҳмадов пешниҳод кард, ки ЮНЕСКО ҷашни Наврӯзро ба рӯйхати ҷашнҳои умумиҷаҳонӣ дохил намояд.                   Дастархони оростаи маҳфили наврӯзӣ, ки аз ҳафт «син»- суманак, сабзӣ, сикка, сирко, себ, сир ва санҷид ва ҳафт «шин»- ширинӣ, шамъ, ширбиринҷ, шарбат, шамшод, шинӣ ва шир, ки ҳар яке аз ин рамзҳо маънои хоси худро дорад иборат буд.                  Дастархони наврӯзии Эрон ғайр аз ҳафт «син»-у ҳафт «шин» бо ҳафт «мим» ва қариб ҳамаи навъҳои гул- сумбул, садбарг, сияҳгӯш, наргис ороста мешавад.                  Дар доираи маҳфил иштирокчиёни он намоишгоҳи китобиро тамошо карданд, ки бахшида ба Наврӯз ба маърази тамошо гузошта шуда буд.