НАРХИ ЧИПТАИ ҚАТОРИ РОҲИ ОҲАН АРЗОН ШУД

                        Душанбе, 20 март. (АМИТ «Ховар», Мавзуна Бойева). — Аз Корхонаи воҳиди давлатии «Муассисаи роҳи оҳани Тоҷикистон» ба АМИТ «Ховар» хабар доданд, ки нархи чиптаҳои нақлиёти роҳи оҳан дар мамлакат аз 10 март сар карда, тадриҷан арзон мешавад. Ин дар натиҷаи гуфтушунид бо роҳбарияти муассисаи роҳи оҳани ҷумҳурии Ӯзбекистони ҳамсоя муяссар гардид.                         Бояд гуфт, ки Ӯзбекистон аввали моҳи январи соли равон арзиши убуру мубури қаторҳои роҳи оҳани Тоҷикистонро ба воситаи қаламрави худ сеюним баробар зиёд кард. Бинобар ин ҷониби Тоҷикистон ҳам нархи чиптаҳоро то андозае қимат намуд. Айни ҳол нархи чиптаи қатори роҳи оҳани Душанбе — Маскав 704 сомонию 35 дирам дар вагонҳои умумӣ ва 870 сомонию 84 дирам дар вагонҳои ҳуҷрадор мебошад.