НИҲОЛШИНОНӢ ДАР МУРҒОБ

                Хоруғ, 6 март. (АМИТ «Ховар», Лутфишо Додоев). — Дар минтақаҳои болооби дарёи Панҷ, аз ҷумла ноҳияи Мурғоб ҳанӯз рӯи заминро қабати ғафси барф пӯшондааст, аммо дар навоҳии Дарвозу Ванҷ маъракаи кабудизоркунӣ оғоз ёфт. Тавре аз Кумитаи ҳифзи муҳити зисти ВМКБ ба мухбири АМИТ «Ховар» иттиллоъ доданд, дар деҳоти ноҳияи Дарвоз беш аз ҳазор бех буттаҳои ороишӣ, ниҳолҳои мевадиҳанда ва сояафкан шинонда шуд. Дар ноҳияи Дарвоз имсол ба шинондани ниҳолҳои ситрусӣ эътибори ҷиддӣ дода мешавад. Пайдост, ки ноҳияи Мурғоб иқлими сард дорад. Ба ин нигоҳ накарда, соли ҷорӣ бо имдоди олимони Пажӯҳишгоҳи биологии Помир дар ин ҷо ниҳолҳои гуногун шинонда мешаванд.                 Умуман, тибқи нақша, соли ҷорӣ дар саросари вилоят 480 ҳазор бех ниҳол шинонида шуда, дар масоҳати 24 гектар боғ бунёд хоҳад гашт.