ҚАРЗИ БОНКӢ БА ХОҶАГИҲОИ ХУРД ДОДА МЕШАВАД

                Душанбе, 23 апрел. (АМИТ «Ховар», Бекназари Абӯбакр). — Шӯъбаи ҶСК «Агроинвестбонк» дар минтақаи Кӯлоб ба хоҷагиҳои пахтакор ба маблағи умумии 2 миллиону 376 ҳазор сомонӣ қарз ҷудо кард.                Дар бонки мазкур ба мухбири АМИТ «Ховар» гуфтанд, ки қарзҳои нахустинро барои мавсими имсола 121 ҳоҷагӣ гирифтанд, ки дорои 1416 гектар замин мебошанд. Соли равон бонк ҷиҳати ҷудо кардани қарз аз 195 хоҷагии деҳқонӣ ба маблағи умумии 9 миллиону 790 ҳазор сомонӣ дархост гирифт.                Мавриди зикр аст, ки хоҷагиҳои соли равон қарзгирифта пурра маблағи соли гузашта гирифтаашонро ба бонк пардохт кардаанд. Таҳлилҳо нишон доданд, ки хоҷагиҳои деҳқонии бузурги минтақа аз ӯҳдаи пардохти қарз ба таври бояду шояд баромада наметавонанд, аз ин рӯ соли ҷорӣ ҷудо кардани маблағ бештар ба хоҷагиҳои хурду миёна тавсия шудааст.