ҚУРБИ ПУЛИ МИЛЛӢ МӮЪТАДИЛ АСТ

                 Душанбе, 7 апрел. (АМИТ «Ховар», Бекназари Абӯбакр). — Дар моҳҳои охир дар бозори нақдии асъори ҷаҳон, бахусус дар баъзе аз мамлакатҳои ИДМ ба характери «шинокунанда» гирифтор шудани асъори миллии ин кишварҳо ба назар мерасад. Қурби асъор дар бозорҳои нақдии амалкунандаи Тоҷикистон, мувофиқи гузоришҳои ҳаррӯзаи Бонки Миллии Тоҷикистон чандон назаррас тағйир наёфта, пули миллӣ характери мӯътадилро расм карда аст.                 Ба иттилои хадамоти матбуот ва рекламаи БДА ҶТ «Амонатбонк» дар давоми чанд рӯзи охир дар қурби миёнаи харид ва фурӯши доллари ИМА дар бозорҳои нақдӣ тағйироти ҷузъӣ ба назар расида, дар ҳудуди 3,83-3,85 сомонӣ ба қайд гирифта шудааст. Ҳамзамон, қурби миёнаи харид ва фурӯши рубли русӣ ва евро мутаносибан 0,1130 — 0.1140 сомонӣ ва 5,08 — 5,13 сомониро ташкил медиҳанд.                Қурби асъоре, ки дар бозорҳои байнибонкӣ ва дохилибонкӣ фаъолият мекунанд, аз андаке зиёд шудани талабот ба рубли русӣ ва евро дарак медиҳад, ки ин шаҳодати фаъолтар гаштани амалиётҳо бо рубли русӣ ва евро мебошад. Қурби миёна аз рӯи ин асъор мутаносибан дар сатҳи 0,11336 сомонӣ ва 4,9681 сомонӣ муқаррар гардид.                 Мавриди зикр аст, ки тамоюли таҳким ёфтани рубли русӣ ва евро нисбат ба доллари ИМА дар бисёр бозорҳои байналхалқии асъорӣ ба мушоҳида мерасад.