ҲАФТАИ КИТОБИ КӮДАКОНУ НАВРАСОН ҶАМЪБАСТ ГАРДИД

                  Душанбе, 8 апрел. (АМИТ «Ховар», Лутфия Эшонқулова).- Имрӯз дар Театри давлатии ҷавонони Тоҷикистон ба номи М. Воҳидов Фестивали ҷумҳуриявии «Ҳафтаи китоби кӯдакону наврасони Тоҷикистон» ҷамъбаст гардид.                  Дар он вазири фарҳанги ҶТ Мирзошохрух Асрорӣ, директори Китобхонаи бачагонаи ҷумҳуриявии ба номи М. Миршакар Қурбон Афғонов ва аҳли илму адаб иштирок намуданд.                  Дар ҷамъомад иштирокчиён аз натиҷаҳои фестивал гузориш дода, қайд намуданд, ки мақсади асосии баргузории он тарғиб ва оммавигардонии хониш дар байни кӯдакону наврасон ва ҷалб намудани таваҷҷӯҳи хонандагон ба китобу китобхонӣ мебошад.                   Ҳамчунин зикр гардид, ки бо гузаронидани Ҳафтаи китоб насли наврас беҳтару бештар бо таърихи миллат, дастовардҳои истиқлолияти миллӣ, мероси баландғояю гаронбаҳои ниёгон ва адибони бачагон шиносоӣ пайдо намуданд.                Дар ҷамъомад иштирокчиёни фаъоли Фестивал қироати шеър намуда, бо тӯҳфаҳои хотирмон қадрдонӣ карда шуданд.                Дар доираи чорабинӣ, намоиши китоб таҳти унвони «Мо- насли хушбахти замон» ва ярмаркаи фурӯши матбуоти даврӣ ва китобҳои нашриётҳои ҷумҳурӣ баргузор шуд.                Дар хотима, барои иштирокчиён барномаи консертии «Базми «Фурӯғи маърифат» бо иштироки хонандагони Мактаб-интернати миёнаи махсуси мусиқии ҷумҳуриявии ба номи М. Атоев, Мактаби миёнаи махсуси мусиқии ҷумҳуриявии ба номи З. Шаҳидӣ ва Мактабҳои бачагонаи санъати ноҳияҳои Варзоб ва Ҳисор доир гардид.