«БАЧАҲО ТАКЯГОҲИ МО»

                     Суғд, 16 апрел. (АМИТ «Ховар», Ҳусейни Нарзулло). — Дар китобхонаи бачагонаи ноҳияи Ғончӣ, ҳафтаи адабиёти бачагон ва наврасон баргузор гардид. Барои он ки барномаи ҳафта рангину хотирмон таҳия шавад, мудири китобхона Н. Умарова, китобдор Ш. Норбоева, китобшинос Д. Намозова, мушовири идораи фарҳанг оид ба кор бо бачаҳо И. Икромова ҷидду ҷаҳди зиёд карданд. Дар натиҷа, рӯзҳои намоиши китоб таҳти унвони «Бачаҳо такягоҳи мо», мулоқот ва сӯҳбатҳо бо муаллифони китобҳо бо номи «Шоирон дар васфи бачаҳо», хониши адабиёти ҳаҷвӣ аз рӯи асари нависандаи немис Хауф Вилгелм «Биникадуча», субҳи адабӣ бо номи «Мо насли хушбахти замон», хеле шавқовар гузашт.                    Боиси зикр аст, ки дар ин чорабинӣ баробари иштироки мактабиён бачагони синни томактабӣ низ ҷалб гардиданд. Дар ин ҷода саҳми мудирони боғчаҳои бачагонаи шаҳраки Ғончиро бояд қайд кард.                    Директори китобхонаҳои марказонидашудаи ноҳияи ғончи Шаҳло Умарова гуфт, ки тарбияи кӯдак бояд аз гавҳора сар шавад ва муҳаббати дӯстдории китобро низ дар бачаҳо аз хурдсолӣ тарбият бояд кард.                     Ҳафтаи мазкур бо конфронси адабии китобхонаҳои ноҳия таҳти унвони «Тоҷикистон хонаи умеди мо» ҷамъбаст гардид. Иштирокчиёни фаъол бо тӯҳфаҳои хотиравӣ сарфароз гардиданд.                                                                   Таҳрири Жасмин Назарова