КОНФРОНСИ БАЙНАЛХАЛҚӢ ДАР ДУШАНБЕ

              Душанбе, 30 апрел. (АМИТ «Ховар», Кристина Эрлих). — Дирӯз дар шаҳри Душанбе дар мавзӯи «Истифодаи технологияҳои иттилоотӣ ва алоқа барои кам кардани хавфи фалокатҳои табиӣ дар Осиёи Марказӣ» конфронси байналхалқӣ кушода шуд. Дар он роҳбарон ва кормандони масъули муассисаҳои илмии созмонҳои байналхалқӣ ва хадамоти иттилоотию алоқаи мамлакатҳои Осиёи Марказӣ иштирок доранд. Дар маросими кушодашавии конфронс директори барномаҳои илмии НАТО Крис Виспеларе ва ноиби раиси Академияи илмҳои Тоҷикистон Хуршед Каримов сухан карданд.            Ҳадафи конфронс мавриди истифода қарор додани таҷрибаи мамлакатҳои ҷаҳон ва дар асоси он ташкил намудани шабакаи минтақавии иттилоотӣ ва маркази маълумот барои кам кардани хавфи фалокатҳои табиӣ мебошад. Дар конфронс зикр карда шуд, ки вақтҳои охир миқдори фалокатҳои табиӣ афзуда сабаби ҳалокати одамон ва харобии корхонаю муассисаҳо ва иншоотҳо мегарданд. Конфронс 1 май ба охир мерасад, дар фарҷоми он тавсияҳои дахлдор қабул карда мешаванд.