«МАҲЗАР» ЭҲЁ МЕШАВАД

                Душанбе, 3 апрел. (АМИТ «Ховар», Ибодат Давлатова). — 4 апрели соли ҷорӣ дар Кохи «Ҷомӣ» байни Донишгоҳи давлатии тиббии Тоҷикистон ва Донишкадаи тарбияи ҷисмонии Тоҷикистон озмуни телевизионии маҳфили зарифон «Маҳзар» баргузор мегардад.                Барномаи озмуни телевизионии маҳфили зарифон «Маҳзар» бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар ҳамкорӣ бо Вазорати фарҳанг, Кумитаи телевизион ва радиои назди Ҳукумати Ҷумҳурии Тоҷикистон таъсис ёфтааст.                 Тавре аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ба мухбири АМИТ «Ховар» хабар доданд, маҳфили зарифон тариқи озмун байни мактабҳои олӣ гузаронида мешавад. Дар барнома тамоми мактабҳои олии ҷумҳурӣ ҳуқуқи иштирокро доранд.                  Дастаи мактаби олӣ, ки дар барномаи «Маҳфили зарифон» ширкат меварзанд, танҳо аз ҳисоби донишҷӯёни мактаби олӣ бояд иборат бошад. Ба ҳайати даста ворид намудани донишҷӯёни дигар мактаби олӣ, санъаткорони касбӣ қатъиян манъ аст.                 Интихоби мавзӯи шартҳои озмун озод аст, вале дастаҳо набояд ба таҳқири ҳамдигар роҳ диҳанд. Дастаҳо ба масъалаи тозагии забон таваҷҷӯҳи хоса зоҳир намоянд. Роҳбарият, ташкилотҳои ҷамъиятӣ ва шахсони масъули мактаби олӣ вазифадоранд, ки дар рафти баргузории барномаи телевизионии «Маҳзар» тартибу интизоми баланди донишҷуёнро таъмин намоянд.