МАЪРАКАҲО КАМХАРҶ ГУЗАРОНИДА МЕШАВАНД

                 Душанбе, 30 апрел. (АМИТ «Ховар», Жасмин Назарова). — Ҷиҳати амалисозии талаботи Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» бо иштироки ҳайати шахсии дастгоҳи марказӣ ва воҳидҳои сохтории Кумитаи ҳолатҳои фавқулодда ва мудофиаи граждании ҶТ ҷамъомад гузаронида шуд.                Дар ҷамъомади мазкур роҳбари Раёсати танзими анъана ва ҷашну маросимҳои Дастгоҳи иҷроияи Президенти Ҷумхурии Тоҷикистон Абдураҳим Холиқов, муовини аввали раиси Кумита генерал — майор Маҳмадулло Ҳалимов иштирок намуда, зикр карданд, ки қабули қонуни мазкур ҷиҳати коҳиш додани сатҳи камбизоатӣ дар ҷомеа ва баланд бардоштани вазъи иҷтимоии мардум қабул карда шудааст. Бо қабули қонуни зикршуда дар ҷумҳурӣ гузаронидани маросиму анъанаҳои миллӣ ба танзим дароварда шудаанд.                 Онҳо ҳамчунин роҷеъ ба аҳамияти қабули ин қонун ва роҳҳои татбиқи минбаъдаи он дар ҷумҳурӣ табодули назар карданд.