МУСУЛМОНОНИ ЧИН БО ЭҶОДИЁТИ ИМОМИ АЪЗАМ ШИНОС МЕШАВАНД

                Душанбе, 29 апрел. (АМИТ «Ховар», Наргис Бояхмедова). — Сафири Ҷумҳурии Тоҷикистон дар Ҷумҳурии Мардумии Чин Рашид Олимов 28 апрел дар Пекин бо раиси Иттиҳоди мусулмонони Чин Хиралундин Чэн Гуанюан мулоқот кард. Х.Ч.Гуанюан зикр намуд, ки Иттиҳоди исломии Чин имрӯз бештар аз 22 миллион мусулмонро муттаҳид менамояд. Онҳо намояндагони бештар аз даҳ миллати хурди мамлакат мебошанд. Ҳадафи асосии Иттиҳоди мусулмонони Чин ташвиқу тарғиби сиёсати озодии имон, эҳтироми ҳуқуқу манфиатҳои қонунии мусулмонони мамлакат ва риояи анъанаҳои беҳтарини исломӣ мебошанд, гуфт мизбон.                 Вай афзуд, ки Иттиҳоди мазкур дар саросари Чин 500 филиал дорад ва дар онҳо бештар аз 10 ҳазор нафар кор мекунад. Имрӯз дар саросари Чин бештар аз 45 ҳазор масҷид мавҷуд аст, ки қариб 50 ҳазор имом дорад. Кормандони муассисаҳои динӣ дар 10 донишгоҳи исломӣ тайёр карда мешаванд.                 Мо медонем, ки дар Тоҷикистон соли 2009 соли бузургдошти фарзанди бузурги халқи тоҷик ва мутафаккири барҷастаи ҷаҳони ислом Абӯҳанифа Нӯъмон ибни Собит эълон шудааст. Ман бо таълимоти ин шахсияти барҷаста ба хубӣ шинос мебошам. Имом дар бобати оммавӣ гардондани анъанаҳои неки динӣ ва роҳ андохтани муколамаи фарҳангҳо нақши муҳим бозидааст, гуфт Х.Ч.Гуанюан.                Рашид Олимов зимни сӯҳбат ба роҳбари Иттиҳоди мусулмонони Чин дар бораи фаъолияти муассисаҳои динӣ дар Тоҷикистон, иштироки онҳо дар ҳаёти ҷомеа, мустаҳкам сохтани пояҳои давлатдорӣ ва таъмини сулҳу осоиш дар мамлакат маълумоти муфассал дод. Тарҷумон — Қудратов А.