НИШАСТИ МАТБУОТӢ ДАР ШӮРООБОД

                Шӯрообод, 27 апрел. (АМИТ «Ховар», Сулаймон Холов).- Дар ноҳияи Шӯрообод нишасти матбуотӣ бо иштироки намояндагони воситаҳои ахбори омма баргузор шуд.                 Раиси ноҳия Иброҳим Азизов аз натиҷаи ҷамъбасти тараққиёти семоҳаи соли ҷорӣ ба хабарнигорон ахборот дод. Аз ҷумла, зикр намуд, ки дар ин давра дар соҳаҳои мухталифи хоҷагии халқи ноҳия болоравии нишондодҳои макроиқтисодӣ таъмин карда шуд. Бояд қайд намуд, ки нақшаи даромади бюҷети маҳаллӣ дар 3 моҳа аз ҳисоби даромадҳои худӣ 105 % иҷро шуда ба бюҷет ба ҷои 330 298 сомонӣ дар нақша пешбинишуда маблағи 345 673 сомонӣ ворид гардидааст. Инчунин нақшаи қисми даромади бюҷети фонди ҳифзи иҷтимоии аҳолӣ 102,4 % иҷро гардид, ки ба ҷои 329 097 сомонӣ маблағи 337 027 сомонӣ ба бюҷет ворид гардидааст.                   Дар нишасти мазкур дар мавриди таъмини шаҳрвандони бешуғл бо ҷои кори доимӣ сухан рафт. Қайд гардид, ки аз тарафи Агентии ҳифзи иҷтимоии шуғли аҳолӣ ва муҳоҷирати ноҳия 4 маротиба ярмаркаи ҷойҳои кории холӣ гузаронида шуд. Дар натиҷа 36 нафар ба корҳои муздноки ҷамъиятӣ, зиёда аз 60 нафар ҷавонон ба курсҳои омӯзишии «Фермер боғпарвар» ва «Кафшергари газию барқӣ» равона гардиданд.  Зимни нишаст оиди фаъолияти соҳаҳои тандурустӣ, саноатӣ, фарҳанг, маориф, қисмҳои низомӣ, ҷиноят ва ҷинояткорӣ мавриди саволу ҷавоб қарор гирифт.                                                                          Таҳрири Жасмин Назарова