ОРИЁНБОНК ШИРКАТИ ҲАМКОРАШРО ИНТИХОБ КАРД

               Душанбе, 8 апрел. (АМИТ «Ховар», Бекназари Абӯбакр). — Аз 2 феврал то 25 марти соли ҷорӣ ҶСК «Ориёнбонк» барои интихоби ширкати таъмингари таҷҳизоти технологияҳои компютерӣ тендер эълон намуда буд. Ҳадафи аслии тендер интихоби ширкатҳои дорои имконияти таъмини таҷҳизоти коммуникатсионии ширкати CISCO барои ташкили амнияти алоқа дар дохили бонк ва таъмини техникаи компютерӣ мебошад.               Мувофиқи шартҳои озмун вобаста ба масъалаи аввал ширкатҳои ҶММ «All Service», ҶММ «КМ Партнер», ҶДММ «Service trade», Ширкати илмӣ-истеҳсолии «RISK» иштирок намуда, пешниҳодҳои худро баён намуданд.               Доир ба масъалаи дуюм, пешниҳодҳои ширкатҳои ҶММ «Клина», Мағозаи «Хазина», ҶДММ «Лотус», ҶММ «КМ Партнер»,ҶДММ «Сомон Иншоот», ҶДММ «Марбут» ва ҶММ «Синтез» баррасӣ гардиданд. Озмуни тендерӣ дар ду давр баргузор гардид.               Дар даври аввал, пешниҳодоти ширкатҳо аз рӯи мувофиқии нарх, мӯҳлати таъминот ва мӯҳлати кафолатӣ баррасӣ шуданд. Даври дуюми тендер, пас аз омӯзиши пешниҳодоти тиҷоратии ширкатҳои интихобгардида — ҶММ «КМ Партнер», ҶММ «Service trade», Мағозаи «Хазина», ҶММ «Клина» — гирифтани иқтибос аз суратҳисобҳои онҳо бо гузаронидани гуфтугузори дубора, ба роҳ гузошта шуд. Баъди ҷамъбасти натиҷаву хулосаҳои аъзоёни комиссия аз рӯи ду тендери гузаронидашуда ҶММ«КМ Партнер» ғолиб дониста шуд.