РАИС ҚАРОРИХУДРО ҲИМОЯ КАРДА НАТАВОНИСТ

               Душанбе, 9 апрел. (АМИТ «Ховар», Лаззат Диловарзод).- Тибқи ҳуҷҷатҳои пешниҳод намудаи соҳибкор — Раҳим Гурезов аз шаҳри Ваҳдат, пас аз дастрас кардани қарори раиси шаҳр аз 5-уми маи соли 2008 дар бораи сохтмони мағоза дар бозори шаҳри Ваҳдат, сармеъмори шаҳр Эраҷ Зоҳиров барои бунёди мағоза иҷозат дод. Корхонаи Воҳиди давлатии «Лоиҳакашию истеҳсолии маъмурӣ ва банақшагирӣ» бошад лоиҳаи мағозаро таҳия намуд. Асоси ҳамаи, ин ҳуҷҷатгузориҳо мактуби директори бозори шаҳри Ваҳдат дар бораи мавҷуд будани замини сохтмонии назди бозор ба раиси шаҳр мебошад.               Кумитаи заминсозии шаҳри Ваҳдат сертификати ҳуқуқи истифодаи заминро ба соҳибкор Раҳим Гурезов бо мӯҳру имзо супоридааст ва дар охир идораи сӯхторхомӯшкунӣ ва муҳити зисти шаҳр низ мӯҳру имзои худро гузошт. Аммо бо гузашти 9 моҳ ҳеҷ яке аз ин идораҳои мӯҳру васиқадиҳанда имзои худро ҳимоя намекунад ва Раҳим Гурезов барин даҳҳо соҳибкор дар шаҳри Ваҳдат сарсону саргардон аст.