ТАШРИФИ НИКОЛАЙ БОРДЮЖА БА ТОҶИКИСТОН

                  Маскав, 23 апрел. (АМИТ «Ховар», Ҳалима Хушқадамова). — Мухбири АМИТ «Ховар» аз Маскав хабар дод, ки Муншии умумии Созмони Аҳдномаи амнияти дастаҷамъӣ Николай Бордюжа субҳи имрӯз барои боздиди кории дурӯза ба Тоҷикистон рафт.                  Н.Бордюжа ба хабарнигорон гуфт, ки сафари Тоҷикистон аз рӯи нақша сурат мегирад ва ҳадафи он муҳокимаи масъалаҳои тайёрӣ ба мулоқоти сарони давлатҳои аъзои созмон ва баррасии тадбирҳои ҷараёни иҷрои маҷлиси ғайринавбатии Шӯрои амнияти дастаҷамъии СААД аст, ки моҳи феврал баргузор гардида буд. Инчунин, зимни сафар масъалаҳои марбут ба ташкили Қувваҳои дастаҷамъии вокуниши таъҷилӣ муҳокима карда мешаванд.                 Николай Бордюжа зимни сафар бо Президенти Тоҷикистон Э.Раҳмон, Котиби Шӯрои амнияти ҷумҳурӣ А.Азимов, вазири корҳои хориҷӣ Ҳ.Зарифӣ, вазири мудофиа Ш.Хайруллоев, раиси Кумитаи давлатии амнияти миллӣ Ҳ.Абдураҳимов, вазири корҳои дохилӣ А.Қаҳҳоров ва раиси Кумитаи ҳолатҳои фавқулодда ва мудофиаи шаҳрвандии назди Ҳукумати Тоҷикистон Г.Латифов мулоқот хоҳад кард.                 Дар ҷараёни ин мулоқотҳо масъалаҳои беҳтар сохтани фаъолияти СААД, таҳкими амнияти минтақавӣ, ҳамкории ҳарбию иқтисодии мамлакатҳои аъзои созмон ва вазъияти Афғонистон муҳокима карда мешаванд.