ҲУНАРПЕШАГОНИ ТОҶИК БА МОСКАВ МЕРАВАНД

                        Душанбе, 29 май. (АМИТ «Ховар», Тахмина Ғоибназарова).- Аз 31 май то 28 июни соли равон дар Федератсияи Русия барои ҳунарпешагони ҷавони касбии мамлакатҳои ИДМ ва хориҷӣ мактаби байналмилалии тобистонаи театрӣ ташкил карда мешавад. Ташаббускори ташкили мактабҳои Иттифоқи ходимони театрҳои Русия мебошад. Ба мактаби мазкур 2 ҳунарпешаи театри руси драмавии Тоҷикистон ба номи В. Маяковский Елена Князева ва Марина Ярмольник низ даъват шудаанд. Онҳо дар мактаби мазкур маҳорати касбӣ ва нутқи саҳнавии худро такмил дода, дар машғулиятҳои акробатикаю шамшербозӣ ширкат меварданд. Ба ҳунарпешагони ҷавон устодони санъати Русия дарс медиҳанд. Ҳунармандон дар чор асари саҳнавӣ иштирок намуда, бо ҳунарпешагони машҳур: Александр Колягин, Петр Фоменко, Лев Додин, Леонид Хейфец, Олег Табаков, Галина Волчек, Юрий Саломин ва Валерий Фокин мулоқот хоҳанд кард.                         Дар соли 2007-2008 210 ҳунарпеша аз 30 мамлакатҳои ИДМ, Балтия, Европа ва Осиё дар ин мактаб таҳсил карда буданд. Роҳбари бадеии мактаб — Раиси иттифоқи ходимони театрии Федератсияи Русия, ҳунарпешаи халқии Русия — Александр Калягин мебошад. Имрӯз ҳунарпешагони тоҷикистонӣ Е. Князева ва М. Ярмолник ба Москав мераванд.