БАРРАСИИ НАҚШАҲОИ ҲАМКОРИИ ТОҶИКИСТОНУ АВСТРИЯ

                     Душанбе, 12 май. (АМИТ «Ховар», Наргис Бояхмедова). — Дар Душанбе машварати сиёсии намояндагони вазоратҳои корҳои хориҷии Ҷумҳурии Тоҷикистон ва Ҷумҳурии Австрия баргузор гардид. Ҳайати Тоҷикистон дар ин мулоқот таҳти роҳбарии муовини аввали вазири корҳои хориҷӣ Абдулло Юлдошев ширкат варзид. Ба ҳайати Австрия директори департаменти мамлакатҳои Аврупои Ҷанубию Шарқӣ, Ҷануби Қафқоз ва Осиёи Марказии вазорати федералии масъалаҳои байналхалқии Ҷумҳурии Австрия, сафир Ф.И.Куглич роҳбарӣ кард.                   Зимни мулоқот масъалаҳои марбут ба нақшаҳои ояндаи ҳамкории Тоҷикистону Австрия дар соҳаҳои сиёсию иқтисодӣ, фарҳангию гуманитарӣ ва ҳамкории ҳар ду кишвар дар доираи Иттиҳоди Аврупо баррасӣ шуданд. Иштирокчиёни мулоқот инчунин масъалаҳои марбут ба сафарҳои расмӣ ба мамлакатҳои ҳамдигар, ҳамкории минтақавӣ, тайёрӣ ба маҷлиси Комиссияи муштараки ҳамкории Тоҷикистону Австрия ва ғайраро муҳокима карданд.