ДИТ БА ҲАЙАТИ СРДОИ ПАЗИРУФТА МЕШАВАД

                    Душанбе, 13 май,(АМИТ «Ховар», Марзия Саидова).-Дар ояндаи наздик донишкадаи исломии Тоҷикистон ба номи Имоми Аъзам ба ҳайати Созмони робитаи донишгоҳҳои олами исломӣ пазируфта мешавад.                   Масъалаи ба узвияти ин созмони мӯътабар пайвастани донишкадаи исломии Тоҷикистон дар пойтахти Ҷумҳурии Мисри Араб -шаҳри Қоҳира зимни мулоқоти ректори донишкадаи мазкур Абдуҷалол Ализода бо дабири кулли Созмони робитаи донишгоҳҳои исломӣ доктор Ҷаъфар Абдуссалом баррасӣ шуд. Дар робита доктори мисрӣ пешниҳод намудани ҳуҷҷатҳои зарурӣ, баррасӣ ва имзои созишномаҳои ҳамкориро яке аз шартҳои асосии ба узвияти ин созмон пазируфта шудани донишкадаи исломии Тоҷикистон донист.                  Алҳол, дар ҳайати Созмони робитаи донишгоҳҳои олами исломӣ 150 донишгоҳи кишварҳои мусулмонӣ пазируфта шудаанд. Қароргоҳи созмони мазкур дар Арабистони Саудӣ аст.                 Сарвари донишкадаи исломии Тоҷикистон А. Ализода мегӯяд, ки шомил шудан ба ин созмони мӯътабар аз манфиат холӣ нест. Зеро он ҷиҳати рушди донишкада, хусусан тақвият бахшидани базаи моддию техникии он, таъсиси китобхонаи электронӣ ва дигар паҳлӯҳои дурнамои донишкадаи исломии Тоҷикистон нақши муҳим мегузорад.