ЭҲЁИ ҶӮРОБҲОИ ПОМИРӢ

                        Бадахшон, 25 май. (АМИТ «Ховар», Лутфишо Додо).- Ҷӯроббофӣ шуғли пешинаи занони Бадахшон аст. Дар даврони Шӯравӣ ҷорӯбҳои помириро аҳён-аҳён танҳо ба хотири тӯҳфа барои меҳмонон мебофтанду халос. Қариб буд, ки ин пешаи нодир ба хурҷини фаромӯшӣ равад. Дар эҳёи ин неъмати гаронбаҳо қабл аз ҳама ҳиссаи занони меҳнатдӯсти яке аз дурдасттарин гӯшаи вилоят, водии Бартанги ноҳияи Рӯшон калон аст. Онҳо дар муддати кӯтоҳ кулли бозорҳои вилоятро зери тасарруфи хеш қарор доданд. Ва на танҳо пешаи қадимии ин мардумро эҳё гардониданд, балки аз даромади гирифтаашон рӯзгори хуш ҳам доранд. Зеро ба ҷӯробҳои помирӣ меҳмонони мамолики хориҷӣ, ба вижа шаҳрвандони Амрикову Аврупо таваҷҷӯҳи хоса доранд. Ин бошад ба буҷаи оилавии ҳунармандон маблағи хуб ворид мегардонад. Имрӯз ҷӯроббофӣ дар вилоят равнақ пайдо намудааст.